Na Lider di Frakshon di PAR
Sra. Emily de Jongh-Elhage
Presente.
Bo Referensha: Bo karta: Nos number: 532a V/11-12
25 di yanüari 2012
Willemstad, 27 di yanüari 2012
Apresiabel Sra. De Jongh-Elhage,
M’a tuma nota di bo karta di 25 di yanüari último den kua frakshon di PAR ta pidi un reunion públiko riba e tópiko: “Komportashon i ekspreshonnan di presidente di parlamento un peliger pa demokrasia di Kòrsou”.
Na promé lugá mi ta konstatá ku ta hopi remarkabel ku awor numa frakshon di PAR ta realisá ku e funshon di Presidente di Parlamento ta un di e funshonnan mas haltu den nos País, pasó ta for di òktober 2010 e mesun frakshon di PAR aki a bin ta saka mentira tras di mentira pa trata na difamá tantu e funshon di Presidente di Parlamento komo mi persona.
Sin ke pèrdè tempu na desbaratá kada un di e mentiranan den bo karta, mi ta djis mustra riba algun di e ekspreshonnan mentiroso i difamatorio ku parlamentario Malvina Cecilia di PAR a hasi durante e último dos lunanan ku e meta pa difamá tantu Minister-Presidènt Schotte komo algun kolega-parlamentario:
• “...e chabalitu peligroso, mentiroso i oportunista di marka mayó señor Gerrit Schotte, e diabel pèrsonifiká na mundu señor Helmin Wiels, e diktadó insigur i frakasá Ivar Asjes i last but not least, e bendedó di patria sin dignidat, sin solidaridat i sentido di hustisia sosial pa nos pueblo, señora Eunice Eisden...” (desèmber 2011).
• “Hasiendo pueblo di Kòrsou vulnerabel i despues víktima pa esnan ku ke ataka nos pais i tuma poder diktatorial òf terorista, drenta laba plaka i asina hòrta e balor di nos florin i finalmente pone pueblo di Kòrsou na rudia pa pidi nan, si nan, señores Schotte, Wiels, Asjes i señora Eisden, limosna i fabor” (desèmber 2011).
• “Dia ku señor Asjes a sinta komo presidente di parlamento e a kambia diferente kos ku tabatin. Na promé lugá e a disidí di kita señora Desi Lai-Promes komo griffier. Señora Lai-Promes a bai Korte i na final e a gana e kaso den Korte” (yanüari 2012).
E aktitut aki i tipo di ekspreshonnan asina ta demostrá klaramente ku e frakshon di PAR su úniko meta ta pa sembra mas divishon den nos País en bes di logra e union ku abo a bin ta propagá. Ta tempu pa frakshon di PAR duna klaridat na Pueblo di Kòrsou i indiká unda PAR ta pará i kiko e ke realmente, esta union òf mas divishon na Kòrsou.
Tambe, mi ta rekordá bo persona ku, komo Minister-Presidènt di Antia, na mart 2010 durante un kongreso na Aruba bo a hasi un ekspreshon hopi peligroso pa nos demokrasia, esta ku prensa lokal ta tacha derecho di privasidat di suidadanonan i ku mester introdusí un Lei pa pone un paro na esaki. Manera bo sa, hopi hende den nos komunidat a haña bo ekspreshon unu sumamente repudiabel i tambe e gran mayoría di medionan di komunikashon na Kòrsou, e tempu ei, a rechasá e intenshon maligno di Gabinete De Jongh-Elhage pa trata na sera boka di prensa.
Anto, ainda mi no a bai den detaye riba e ekspreshon ku parlamentario Pedro Atacho di PAR a hasi resientemente ora a sali na klá ku e ta metí den e sonado kaso di lèkmentu di informashon privá di dos Minister di Gabinete Schotte. Hopi hende den nos komunidat ta konsiderá e envolvimentu i aktuashon di parlamentario Atacho den e kaso aki komo un violashon di nos Kódigo Penal i un daño supstansial na e bon imagen di nos País i nos demokrasia.
Un biaha mas; ta ora pa abo i PAR duna klaridat na Pueblo di Kòrsou i indiká bon klá si boso ta sigi riba e ruta destruktivo i bergonsoso, lokual ta e bèrdadero peliger pa demokrasia di Kòrsou. Mi ta hasi un apelashon urgente riba bo persona pa pone un paro na e ekspreshonnan mentiroso i difamatorio ku parlamentarionan di PAR a bin ta hasi for di òktober 2010 i pone un paro tambe na e guera frontal i divishon kontinuo ku PAR ta buska i sembra na Kòrsou, sin duna Pueblo e trankilidat ku e meresé.
Finalmente mi ta informa’bo ku konforme artíkulo 64, insiso 1, di reglamentu di òrdu lo mi agregá e punto/tópiko: “Komportashon i ekspreshonnan di parlamentarionan di PAR, un berguensa pa Parlamento i peliger pa demokrasia di Kòrsou” na e agènda di e reunion ku frakshon di PAR a pidi. E reunion aki lo tuma lugá riba djabièrnè 3 di febrüari awor, 9’or di mainta.
Presidente di Parlamento,
___________
drs. Ivar Asjes
Add this page to your favorite Social Bookmarking websites
| < Prev | Next > |
|---|
