Sr. Presidente, miembronan di Staten,
• Nos ta weta for di dia ku mi kabinete a keda instalá, ku a bini un avalansha di publikashonan, akusashonan i sospechonan rondó di e proseduranan di screening di ministernan di mi kabinete. Gran parti di e avalancha aki a bin for di e skina di oposishon, speshalmente di miembronan di partido PAR. Ku nan reklamonan i akusashonnan kasi diario sin ku e prosedura di screening tabata finalisá, nan a trese hopi konfushon i inkietut den nos komunidat. Esaki ta tuma lugá den un periodo den kua de fakto nos tur mester dediká nos energia i nos tempu full na desaroyo di nos pais nobo.
• Ta p’esei awe mi ke duna kuenta i rason na parlamento di Korsou, i na e pueblo di Kòrsou, tokante e pasonan ku a ser tumá, i e proseduranan ku ami komo esun responsabel pa screening di ministernan, a sigui.
• Den e kuadro aki, mi ke entregá un relato por eskrito na Staten. Mi a entregá tambe un relato por eskrito serka Sr Gobernador awe mainta. E relato pa Staten no solamente ta splika mi “bevindingen” i mi konklushonnnan pa ku e screening di ministernan, sino tambe e kuadro huridiko estatal i konstitushonal den kua nos mester traha ora ta trata di e asunto di screening i benoeming di miembronan di un kabinete di Kòrsou.
• En grandes lineas e relato ta duna un kompilashon di e papelnan ku nos organonan i instanshanan ta hunga den e tipo di proseduranan aki. Mi ta haña ku esaki ta nesesario wetando e konfushon ku tabata reina resientemente tokante hasta e papel ku nos Gobernador ta hunga. Tambe e relato ta splika kon mi a trata e bevindingen di servisio di seguridat i kiko mi konklushonnan ta pa ku miembronan di mi kabinete.
• Sr Presidente, si mi ke splika en breve kiko a pasa den e prosedura pa screening, mi tin di bisa lo siguiente: e screening a tuma hopi tempu pasobra te ainda ta falta un par di aspekto den e reglanan ofisial pa ku e prosedura di screening durante formashon di un kabinete. E Landsbesluit ku e gobièrno anterior a introdusí resientemente - esta na kuminsamentu di e ana aki dia 10 di februari - no ta inklui tur e pasonan ku ta nesesario pa un screening manera el a bira kustumber den nos pais. E Landsbesluit aki, ku mi ta entregá tambe na Staten pa nan mes por mira, no ta kontené por ehempel e papel i pasonan ku ta regardá e trabou di Servisio di Seguridat den kuadro di screening.
• E omishon aki, a trese kune ku e Servisio a kontribui na e konfushon dor di no tene su mes na e limitashonnan di lei, i tambe dor di aktua na un manera solitario. Tantu ami komo minister-president, komo organisashonnan ku nan a aserká den kuadro di nan investigashon, a keda malinformá tokante e tipo di investigashon ku e servisio di seguridat normalmente ta hasi den kuadro di screening, i a base di kua lei e servisio ta aktua i ki derechonan i tambe limitashonnan ku e lei tin pa protehá nos estado di derecho.
• E inkietut den nos komunidat a keda reinforsá dor di oposishon, muy espeshal partido PAR, ku konstantemente a duna kritika riba kada paso ku nos a tuma sin warda resultadonan di e screening. Komo partido di oposishon nan no a konfia niun momento e kabinete i mi persona komo minister-presidente ku mi lo sigui e proseduranan manera debe ser. Nan a warda ni finalisashon di e screening pa ya kaba nan saka nan konklushon. Partido PAR a bai asina leu ku hasta nan a tene un konferensha di prensa siman pasá, den kua nan ta akusá prome minister di nos paisdi a gaña i ta kibra lei. I hasta nan a premirá kaba ku pronto nan lo ta formando un gobièrnu nobo, i nan a deklará ku e koalishon lo no konsisti di PAR i MFK.
• Sr Presidente, den nan ansha di kier akusá ami komo prome-minister di hopi kos i pa kibra a gobiernu aktual, nan a lubida ku nos ta papiando di algu sumamente fundamental den nos estado di derecho. Den un screening di minister e servisio di seguridat ta hunga un sierto papel. I e papel aki mester tin un base den lei. Pakiko esei ta importante? Pasobra e servisio ta generá i duna dato tokante e bida profeshonal i tambe e bida privá di e personanan konserni, algu ku normalmente niun hende i ni gobièrno no tin e derecho di mete kuné. E derecho di un hende riba su privasidat ta un derecho sumamente fundamental den nos estado di derecho i esei mester keda protehá. Den e kaso ku un persona ta dispuesto pa bira minister, mester tin bon garantia ku e informashon di su bida profeshonal i privá no ta keda malusá i ku e informashon aki no ta bira públiko.
• Awor, sr presidente, permitimi splika en breve na Staten kiko a pasa den e prosedura di screening di e kabinete aki.
• E servisio di seguridat a malinforma ami i otro persona i tambe instanshanan den nos komunidat tokante e prosedura rondo di e investigashon den kuadro di screening;
• Sin outorisashon e servisio a entamá un asina yama veiligheidsonderzoek, ku tin nada di haber ku screening di kandidato pa bira minister. Nan a entamá esei sin opdracht pa un onderzoek asina, i sin tene nan mes na e lei ku ta duna kriterianan pa un investigashon asina, manera buska permit di e personanan konserní prome ku bo ta investigánan.
• Tambe nos a weta ku ta tin fayonan prosedural a base di konfushon rondo di e papelnan di e diferente organonan konstitushonal den nos pais.
• Loke tambe a sosode ta ku nos tin un partido den oposishon ku a malusa tur e susesonan aki pa trese bruashon den pueblo i a bini ku un avalansha di akusashonan pa nan mes gana politikamente for di esaki, aunke nos ta deal ku un fayo hopi esensnshal den nos pais.
• Kiko presis a pasa den e kuadro huridiko estatal i tambe konstitushonal mi ta splika ampliamente den e relato ku mi ta entregá na Staten.
• Loke tambe mi ta splika den e relato ta, ku mi a tuma nota di e bevindingen di servisio di seguridat, i kaminda tabata nesesario mi a sigurá ku a tuma e medidanan nesesario pa por garantisá integridat di e mandatarionan konserní. Loke e servisio a bini kune komo su “bevindingen” ta kasi meskos ku mi a diskutÍ kaba ku e personanan konserni durante e periodo di formashon.
Sin ku mi ta drenta den detayses personal, mi ke bisa ku riba e puntonan kaminda tabata nesesario a tuma pasonan usual manera saniamentu di debenan fiskal, of “vervreemding” di poseshonnan den kompanianan. For di e antesedenten-onderzoek di procurador-general a sali na kla ku niun di e miembronan di e kabinete tin un historia of sospechonan kriminal ku lo prohibi e persona di bira minister den pais Kòrsou.
• Pesei, sr presidente, mi por a yega na e konklushon ku mi a presentá tambe na sr Gobernador, ku mi no ta mira motibu pakiko un of mas persona den mi kabinete lo no por funshoná na un manera íntegro komo minister pa pais Korsou. Tur a kumpli ku e richtlijnen ku ta menshoná den e Landsbesluit.
• Sr Presidente, aunke ku awor aki tin klaridat riba e screening i nos tin seguridat ku tur kandidato a pasa e screening, Gobierno lo tuma dos pasonan spesifiko pa garantisá ku den futuro lo no tin inklaridat mas riba screening di kandidatonan pa bira minister.
• Na promé lugé nos lo entamá un investigashon profundo den funshonamentu di nos servisio di seguridat pa saka afó pakiko nan investigashon den kuadro di e screening a bai robes.
• Na di dos lugá, nos ke amplia i reinforsá e lei ku ta regla e “richtlijnen voor de benoeming van ministers.” Enbes di un Landsbesluit manera e ta te awor aki, nos ta preferá pa un asuntu asina importante ta keda tratá den un Landsverordening, esta un lei formal. Pronto nos lo entregá na Staten un concept-Landsverordening asina. Den e lei ei nos ke regla tambe spesifikamente e papel di e servisio di seguridat. Pasobra esei no ta bon reglá te awor aki, ni tampoko den e landsbesluit mas resien di gobièrno anterior ku nan a firma 10 di februari di e aña aki.
• Pues, senor presidente nos ke pone un fundeshi fuerte pa e prosedura di screening den futuro, nos ke evitá ku tin un otro formateur ku ta haña su mes konfrontá ku tantu problemanan tokante un asunto asina fundamental.
• Mi ta spera ku nos por sigui for di awor aki ku kosnan mas konstruktivo pa nos pais. Nos pais nobo no ta meresé un guerra politiko asina na kuminsamentu di nos eksistensha. A bira tempu pa kada un di nos akseptá e papel ku e tin den nos arena politiko despues di e elekshon mas resien. E papel ku un partido di oposishon ta hunga no ta pa e stroba e gobièrno ku ta sinta konstantemente.
• Sr presidente, nos a kaba di nase komo pais. Mas ku un biaha mi a splika ku nos pais mester di tur energia positivo i konstruktivo di kada un di nos pa por desaroya nos pais. Por ta masha bon ku no semper nos ta di akuerdo ku otro riba kon nos ke desaroyá nos pais. Esei ta normal i nos sistema politiko ta duna espasio na oposishon pa bini ku nan mes ideanan i tambe pa kritiká koalishon.
Pero semper na un manera konstruktivo. Ku un aktitut destruktivo, manera PAR a duna muestra di dje despues di e elekshon, bo no ta yega na nada. Ban traha na interes di nos pueblo enbes di nos mes interes polítiko.
Esei ta e deber di kada politko di nos pais hoben. Mi ke finalisa ku e mesun palabranan ku mi a usa na kuminsamentu di mi deklarashon: Nos ta den un periodo den kua eigenlijk nos tur mester dediká nos energia i nos tempu full na desaroyo di nos pais nobo.
Esei lo duna fruta ku henter nos komunidat por probechá di dje.
Add this page to your favorite Social Bookmarking websites
| < Prev | Next > |
|---|
