Siudadanonan di Kòrsou, nos a drenta un pais nobo algun dia pasa i komo un siudadano preokupá pa e funshonamentu di e kadena hudisial, mi tin e deber di denunsia i eksigí pa nos aparato hudisial ta funshoná konforme nos lei i reglanan i pa sigur e funshon di Prokurador General wòrdu ehersé pa un persona íntegro i kapas ku ta gosa di konfiansa di nos komunidat. Konforme Areglo di Estado di Antia Hulandes (Staatsregeling van de Nederlandse Antillen) esakinan ta e tareanan di un
Prokurador General:
Art. 113 -1 - Prokurador General ta e kabes di Ministerio Públiko i ta responsabel pa e kuerpo di polis hudisial riba henter Antia Hulandes. Prokurador General ta outorisá pa duna instrukshonnan na ámtenarnan ku ta enkargá ku kuerpo polisial pa Prevenshon, Investigashon i Pèrsekushon di delitunan òf infrakshonnan ku e ta haña ta nesesario na interes di Hustisia adekuá.
Art. 113 -2 - Prokurador General ta vigilá pa un funshonamentu dirigí di tareanan di polis. Prokurador General ta outorisá pa trese proposishonnan ku ta útil pe. Realidat ta ku e aktual Prokurador General sr. Mr. D.A. Piar NO ta gosa di konfiansa di sigur famia Claret debí na e tantísimo mentiranan i inkubrimentu di aktonan kontra di lei ku sr. Piar a permití kontra di un siudadano ku simplemente a pidi pa hasi un investigashon kontra di aktuashon di e team di Zero Tolerance bou di guia di Inspektor di Polis Ronaldo Abrahams ku a kometé múltiple violashon di nos kódigo di prosedimentu Penal.
Enbes di sr. Piar asumí su responsabilidat komo un persona íntegro e ta opta pa sostené mentiranan (perhurio) i asta bai asina leu di trata na mal informá nos komunidat. Esaki ta sigur un echo ku NO ta aseptabel i ku ta tacha e integridat di un instansha manera Ministerio Públiko kual tin komo konsekuensha ku komunidat awe no tin konfiansa mas di Ministerio Públiko.
Esaki tabata e motibu pa ami Frederik H. Claret dia 27 di òktober entrega un karta na Minister di Hustisia sr. Drs. Wilsoe ku tur e kehonan kontra di e funshonamentu di sr. Mr. D.A. Piar i ku e petishon pa retirá sr. D.A. Piar komo Prokurador General.
Kopia di e karta a bai tambe pa gobernador di Kòrsou sr. Mr. F.M. Goedgedrag, presidente di Korte komun sra. Mr. L.Hoefdraad, Prokurador General sr. Mr. D.A. Piar, i tambe Relashonnan di Reino Minister sr. Mr. Donnert.
Add this page to your favorite Social Bookmarking websites
| < Prev | Next > |
|---|
