Nos sa ku esaki ta un derecho di demokrasia ku den pasado nos a bringa duru pa haya. Pero tòg nos ta pidi boso atenshon.
E derecho demokrasia ku yama votamentu/elekshon, ta un derecho sigur ku hendenan a bringa pa hañele. Pero kiko a pasa ku e derecho aki? Ta bèrdat ku ta hasi uso di nos derecho di un manera demokrasia? Ta bèrdat ku nos, siudadanonan, ta ser skucha? Nos tin algu di bisa/aportá ora ta toka di futuro di nos muchanan? Preguntanan riba kual nos sa ku e kontesta ta NO. No, pasombra pa eskohé un parlamentario ya pa añas no ta bai segun e sistema demokrátiko.
Pa desenanan largu ta masha poko biaha e partido ku nos a skohe a bai sinta tambe. Pa añas polítika mes ta disidí ku ken nan ta bai traha huntu. Anto ku esnan ku e pueblo no a vota pe. Polítika ta kònkel ku otro pa nan mes posishon, pero al fin al kabo ta forsanan di ariba ta disidí ta ken ta bai sinta. No ta e pueblo ta disidí ken ta bai representá nos. Ta esnan ku plaka y asina poder ta disidí ken y unda ta bai sinta. Te awe, niun partido no ta duna kuenta di unda nan ta haya nan plaka pa kore kampaña. Te awe, niun partido a kumpli ku nan promesanan ku nan a hasi durante di nan kampaña. Manipulashon y plaka ya pa hopi aña ta hasi nan trabou aki riba nos isla.
Sinembargo, nos komo siudadano tin un poder masha importante den nos man y esei ta:
No bai di akuerdo ku e wega polítika. E wega di plaka, humiliashon i komersio di sklabitut. Ainda den aña 2010 nos, siudadanonan, ta ser trata komo esklabo. Esei nos por nota dor ku esnan den polítika ta laga nos un banda, humiliá i violá nos. Enseñansa ta malu, aseguro di malesa no ta funshoná, no tin futuro, no tin gobièrnu desente i asina mi por hasi mi lista mas largu.
Ta basta, polítiko a faya i a laga su siudadanonan na kaya. Ta p’esei nos ta pidi pa no bai vota.
- No entrega bo papel di vota na un sentro elektoral. (pasombra mesun momentu ku bo entrega bo vota ya e polítika tiné)
- Un voto blanko tambe ta konta pa un vota i esaki e partido mas grandi lo haña.
Si nos no bai vota, nos komo siudadano lo manda e siñal pa mundu henter ku anos ta hartá di e korupshon, manipulashon i e inkumplimentu di nos polítika.
No kere e kuentanan ku straight bo sa tende, esta si bo no bai vota bo ta deshasí di bo derecho. Puntra e ora ei; Ta kua derecho bo kier mèn anto? Nos derecho ta klaba internashonal i ta juist akinan e no ta ser respetá. Laga nos tur bai uni i mustra nos polítika ku nos tin mas poder ku nan i nos, votadornan meresé rèspèt i nan mester skucha nos manera ta debe ser den un pais demokrasia.
No bai vota.
Movemientu Kontra Korupshon
John Baselmans
Add this page to your favorite Social Bookmarking websites
| < Prev | Next > |
|---|
