Ku hopi atenshon PUEBLO SOBERANO a sigui tur komentario, lamento, sorpresa i supuesto desepshon ku polítikonan i seudo analistanan a bin ta hasi rondó di resultadonan i konsekuensha di elekshonnan na Hulanda. E bèrdat ta ku gobièrnunan hulandes di turno a bin ta prepará e senario pa persekushon i eventual ekspulshon di estranheronan en general i yunan di Kòrsou, arubanonan, bonerianonan i otro habitante di kolonianan hulandes!
Pa esnan ku no sa, e hulandes a bira derechista i rasista masha dia! Loke ta pasa ta ku nos ta demasiado ingenuo (onnozel) pa ripara loke ta evidente! E polítiko hulandes a bin ta traha riba tres(3) trayekto for di añanan 90 pa por yega na e resultado final ku ta ekspulshon di personanan no deseá for di nan teritorio i esei ta inkluí ABO tambe ku bo PASPORT den bo man!
For di añanan 90 nan a bin ta kriminalisá antianonan, miéntras ku nan no ta papia niun palabra tokante di marokanonan! Seguidamente, nan a traha e kuadro hurídiko pa por respaldá e leinan di APARTHEID, sin por diskutí nan, debí ku nan a hasi kambionan di palabra signifikante den nan konstitushon na komienso dje siglo aki, dor di hasi un distinshon entre e “NEDERLANDER” i esun ku tin ‘NEDERLANDSE NATIONALITEIT”, manera nos! Konsekuentemente Gobièrnu hulandes, na 2003 a duna òrdu na e ofisina sentral di statistik(CBS) pa traha un definishon di aloktono (nos) i outoktono (nan).
A keda establesé ofisialmente pa gobièrnu hulandes, ku esnan ku nase na Antia i e yunan ku nase na Hulanda for di un pareha di kua por lo ménos un(1) mayor a nase na Antia, ta keda konsiderá komo stranhero i lo keda tratá komo tal. Esaki enbista ku mester a kuminsá registrá antianonan abase di nan etnisidat i ku tabatin mester di eliminá opstákulonan legal pa por a hasi esaki.
Na 2005 a haña dispensashon di e kolegio pa protekshon di datonan personal (CBP) i ounke e dispensashon a terminá, e 22 munisipionan antiano na Hulanda a keda registrá antianonan! Tene kuenta ku tur esakinan a sosodé bou di e diferente gobièrnunan di turno, inkluso e gobièrnu “amigu” di Sra. De Jongh El Hage, CDA! Ku otro palabra, tur a hiba e mes un maneho!!!
Nos gobièrnunan di un manera kruel a skonde e bèrdatnan aki pa nos pueblo i pa medio di engaño a mara nos na leinan di reino ku ta krea e plataforma pa entre otro e lei di tráfiko di persona den reino, ku nos no tin nada di bisa riba dje, pasobra nan lo bai usa Statüt su artíkulo 3 pa bisti nos ku n’e! E bèrdat ta ku kua gobièrnu ku bini lo sigui ku mes un maneho, pasobra ta palabrashon tin entre nan. E úniko diferensha ta ku lo tin mas konflikto entre di e kolonianan i e kolonisadó Hulanda.
E yoramentu patétiko di ‘kon ta bai hasi awó’, mester traha lugá pa aseptashon di lo inevitabel, esta ku si bo no ke aseptá abuzu den kas di hende, bo tin ku sali for dje kas! Nada otro!!! Ta hopi tristu ku na lugá di bisa pueblo e bèrdat, polítiko i analistanan ta rekurí na yoramentu tokante di derechistanan den gobièrnu hulandes. Ta basta aña tin derechistanan den gobièrnunan hulandes, inkluso PVDA!!!
Ta kriminal pa laga un pueblo den e situashon humiyante i peligroso aki sin splik’é e bèrdat, esta ku kosnan ta bai bira pehor i outonomia no ta eksistí mas!!!
PUEBLO SOBERANO
Helmin Wiels
Add this page to your favorite Social Bookmarking websites
| < Prev |
|---|
