Willemstad - Servisio pa Komunikashon i Informashon ta informá ku evaluashon di e akuerdo di trabou entre Amsterdam i Kòrsou a 
resultá hopi positivo.
Djaluna 24 di ougùstùs, un delegashon di Munisipio Amsterdam presidí pa diputado Freek Ossel a entregá un reportahe tokante ehekushon di e akuerdo ku a firma na ougùstùs 2007 ku Bestuurscollege di Kòrsou. Gezaghebber señora mr. L. Dindial a risibí e dokumento na nòmber di Gobièrnu di Kòrsou den presensia di diputado di Enseñansa, Kultura i Deporte sra. M. Alcalá-Wallé.
Den e rapòrt ta pone énfasis riba e echo ku ounke Gobièrnu di Kòrsou ta den proseso di kambio ku ta kosta bastante energia di tantu Kolegio Ehekutivo komo su aparato Gubernamental, te ku awor por mira bek riba un interkambio di konosementu ku a resultá hopi fruktífero pa ámbos partido.
E akuerdo entre Amsterdam i Kòrsou ta ekstendé su mes riba vários tereno i den kartera di vários diputado. Pa lokual ta trata e kartera di diputado di Enseñansa, Kultura i Deporte, señora M. Alcalá-Wallé, por menshoná lei pa enseñansa obligatorio, maneho di hubentut, aserkamentu di barionan di un forma integral, formashon di nashon i maneho arkeológiko.
Pa lokual ta trata e kartera di diputado H. Davelaar por menshoná e kolaborashon di GGD i proyekto pa midi airu. Ademas a papia riba e programa di stazje yamá “Kennis voor Curacao” i finalmente Registro Sivil. Mester menshoná ku ya for di añanan 90, Kòrsou a kuminsá ku e maneho di integridat kaminda diferente servisio a duna kurso na su personal enkuanto e tema.
Mayoria di e proyektonan mester finalisá na aña 2011. Ku e resultado positivo di e evaluashon, partidonan a disidí ku tin tur motibu pa sigui riba e mes un kaminda i si ta posibel asta purba di profundisá i ekspandé e koperashon.
Riba potrèt por mira momentu ku Gezaghebber señora mr. L. Dindial ta risibí e dokumento for di man di sr. Freek Ossel di Amsterdam den presensia di diputado di Enseñansa, Kultura i Deporte sra. M. Alcalá-Wallé,. Servisio pa Komunikashon i Informashon di Gobièrnu di Kòrsou,
Bron: Notisia247
Add this page to your favorite Social Bookmarking websites
| < Prev | Next > |
|---|