NOSTEVE TELEVISIE VOOR U DOOR U

Willemstad – E hóbennan - Christopher Maduro (20), Roël Pieter (23), Milagros Rodriguez Navarro, Nifa Martis (26), Lernnerth Angela (27) i Neysa Schoop-Isenia (28) a duna un bon bataya djaluna último na Teatro Luna Blou durante e debate titulá: ‘Reino: Nos tin Lei Ku otro?’.

Ademas di e debate tabatin tambe presentashon di Area 51. E debate a keda transmití pa Telecuracao i Radio Hoyer 1. Apesar ku e debate a dura mas ku un ora, tòg e partisipantenan i esnan ku a presensiá esaki a keda ku gana di mas.

Tabatin tres ponensia ku e hóbennan a debatí riba dje: 1. Hulanda ta yuda nos pasombra Hulanda ta stima nos. 2. E relashon ku Hulanda ta mata nos kultura i 3. E úniko kos ku ta uni nos ku Hulanda ta e pasport Ulandes. E tres ponensianan aki a sòru pa un debate fuerte entre e partisipantenan kaminda remarke i komentarionan skerpi a kai.

Matrimonio disfunshonal
Vários pensamentu a kore komo liña kòrá den e debate. Entre otro: “Hulanda for di den historia  te ku awe a imponé hopi riba Kòrsou”, i “Ta nos gobernantenan mes a mustra di ta inkapas pa nan trabou, ku konsekuensha ku Hulanda ta bin ku kondishon i instrukshon”. Tambe e relashon entre Kòrsou i Hulanda a keda deskribí komo un matrimonio disfunshonal i a bini dilanti ku Hulanda ta yuda Kòrsou - no pasobra e ta stima Kòrsou - pero pasobra esaki tin benefisio pa Hulanda mes. Di otro banda a bini diferente bentahanan ku Kòrsou tin estando den Reino, manera akseso na defensa militar i posibilidatnan pa sigui studia.

Den Haag
Un siman pasá tabatin un debate similar na Den Haag pa hóbennan di Kòrsou bibá na Hulanda. Direktor di Radio Nederland Wereldomroep Jan Hoek ta duna di konosé ku e ta sumamente satisfecho ku tantu e debate ku a tuma lugá na Hulanda komo esun di djaluna último aki na Kòrsou. “Ta remarkabel si ku e tópiko ta biba hopi mas aki na Kòrsou’’, Hoek ta bisa. “Esei bo por a ripara na e kantidat i e tipo di argumentunan tresé dilanti.” Otro konklushon ku Jan Hoek a saka despues di e debate ta ku: “E yu di Kòrsou ta keda bini bèk riba historia di sklabitut miéntras ku e Hulandes sa hustamente muchu tiki di e historia ku Hulanda tin ku Kòrsou.”

Kon awor
Pero no ta Jan Hoek so a sa di saka konklushon for di e debatenan. E hóbennan partisipante tambe a saka nan sòm pa loke ta trata: Kon pa sigui awor. Segun Lernnerth Angela e Ulandes i e yu di Kòrsou mester wak otro den kara i atmití kosnan robes ku kada unu a hasi. Christopher Maduro ta sigur ku si kada yu Kòrsou konosé su identidat i stòp di wak patras, Kòrsou ta bai dilanti, estando den e relashon ku Hulanda. Di e sobra partisipantenan por bisa ku nan tabata di akuerdo ku mester bini rèspèt mutuo entre Hulanda i Kòrsou i tambe ku e habitantenan di tur dos banda di oséano mester sa mas di otro pa e relashon por tin un bon resultado.

< Prev		Next >