Sra. De Jongh-Elhage, komo miembro di delegashon di Reino, ku ta ser guiá dor di Promé-Minister Jan Peter Balkenende, ta bai partisipá na vários reunion den e siman ministerial na entre otro apertura di e di 64 Reunion General di Nashonnan Uni i apertura di ‘summit on climate change’.
Riba invitashon di Su Mahestat Reina Rania Al Abdullah di Hordania, Wendi Murdoch i Indra Nooyi, Promé-Minister ta partisipá na e 4th Important Dinner for Woman’ na unda entre otro sra. Sarah Brown, esposa di e Promé-Minister Britániko Gordon Brown, lo ta e orador prinsipal. Meta di e reunion di sena aki ta pa yuda realisá e ‘Millenium Development Goals’ identifiká dor di Nashonnan Uni.
Den kuadro di esaki Promé-Minister ta partisipá tambe na un lùnch ku Minister di Asuntunan Eksterior di Estádos Unídos, sra. Hilary Rodham Clinton ta ofresé na lidernan di gobièrnu femenino i Ministernan di Asuntunan Eksterior. Tambe Promé-Minister De Jongh-Elhage ta partisipá na vários reunion i enkuentro ku entre otro Promé-Minister Balkenende i Embahador di Reino na Nashonnan Uni, Embahador Schaper.
E delegashon di Antia Ulandes ta konsistí di Promé-Minister De Jongh-Elhage, sr. Carel de Haseth den su kalidat di Direktor di Directie Buitenlandse Betrekkingen (DBB) i Hefe di Protokòl Kenneth de Haseth.
Add this page to your favorite Social Bookmarking websites
| < Prev | Next > |
|---|