NOSTEVE TELEVISIE VOOR U DOOR U

WILLEMSTAD –  Un total di 179,379 turista a bishita Kòrsou den e promé 6 luna di 2009. Esaki ta 1% ménos en komparashon ku e mesun periodo di 2008. E kantidat di anochi ku turistanan ta pasa na Kòrsou a baha ku 9% den e mesun periodo.

E desaroyo aki ta resultado di un kresementu di merkadonan Suramerikano i merkado Hulandes i un bahada di merkado Nort Amerikano i merkado Karibense. Un total di 254,953 turista krusero a bishita Kòrsou den e promé 6 luna di 2009 kual ta un oumento di 39% kompará ku e promé 6 luna di 2008. En general por bisa ku e kombinashon di turista for di diferente área i merkado ta yuda turismo di Kòrsou pasa tempunan difísil di krísis relativamente bon en komparashon ku islanan den region di Karibe.

En total 27.771 turista di estadia a bishita Kòrsou den luna di yüni 2009 ku ta un oumento di 6% kompará ku e mesun luna aña pasá. Durante luna di Yüni tráfiko di turista di estadia for di Suramérika a registrá un subida di 60.90% di 7.264 pa 11. 688 turista. Gran parti di e kresementu aki ta bini di e merkado Venezolano ku a registrá 9.551 bishitante na 2009 kompará ku 5.725 na 2008. Otro merkadonan ku a mustra un desaroyo positivo ta e merkado Surinameño ku a oumentá ku 186% di 347 pa 994 turista na 2009. Otro merkado ku a eksperenshá un subida ta e merkado Kolombiano ku un oumento di 41%. Merkadonan ku un desaroyo ménos positivo ta Ecuador (-48%) i Brazil (-19%).
Merkado sur Amerikano den e promé 6 luna di 2009 a registrá un oumento di 6%. Kual tabata debí na kresementu for di merkadonan Surinameño (+52%), Venezolano (+7%), i Colombiano (+4%). Merkadonan ku a kai den e promé 6 luna ta merkado Brazilero (-31%) i Ekuatoriano (-4%).
    
Tráfiko aéreo for di Europa a krese den luna di Yüni ku 3.95% di 9.370 den 2008 pa 9.740 na 2009. Esaki ta debí primariamente na e echo ku Kòrsou a logra mantené i sigui krese su posishon den e merkado Hulandes komo destinashon di biahenan largu atraktivo. A registrá un oumento di 6% den luna di yüni. 2009. Otro merkado importante ku a registrá kresementu na yüni ta Alemania ku un oumento di 28%. E merkadonan europeo ku a desaroyá ménos positivo ta Sweden (-54%),  Finlandia (-19%) i Bèlgika (-8%).
Pa lokual ta trata e promé 6 luna di 2009 por bisa ku turismo for di Europa a oumentá ku 8%. Merkado Hulandes a krese ku 10% kompará ku e mesun periodo den 2008, kual ta kasi 6.000 turista hulandes mas.  Tambe e merkado Aleman a nota un kresementu positivo di 22% kompará ku e promé 6 luna di 2008. E desaroyo di otro merkadonan Europeo tabata ménos positivo, prinsipalmente e desaroyo for di Scandinavia (Finland -26%; Noruega -4%; Sweden -27%).

Tráfiko for di Estádos Unídos i Canada a baha ku 33.29% en komparashon ku yüni 2008. Un total di 3.192 bishitante merikano a bin Kòrsou kompará ku 4.857 aña pasá. For di Canada a biaha 152 turista pa Kòrsou kual ta 3% ménos ku den yüni 2008. Merkado merikano a registrá un bahada di 29% i Canada un bahada di 18% den e promé 6 luna di 2009. Desaroyo di e merkado Merikano den e promé 6 luna ta reflehá e situashon ekonómiko aktual ku Merka ta pasando aden i e echo ku Kòrsou a pèrdè e di dos buelo for di Estádos Unídos na Sèptèmber aña pasa.  Tur kos ta indiká ku e situashon aki lo kambia ku reinisio di American Airlines su di dos buelo na Novèmber di e aña aki.
 
A registrá un bahada di 28.34% den e kantidat di bishitante for di e merkado Karibense. Hopi isla den Karibe ta pasando tempunan difísil pa motibu di e situashon ekonómiko di Estádos Unídos ku ta afektando nan pilar ekonómiko mas importante ku ta turismo. Esaki ta reflehá den e echo ku nan ta biaha ménos tantu pa vakashon komo pa kompra den eksterior. Merkadonan importante ku a registrá bahada ta Trinidad & Tobago (-44%), Repúblika Dominikana (-27%), Jamaica (-22%), Aruba (-19%) i Barbados (-9%).
Sifranan di e promé 6 luna ta reflehá un bahada di 14% di e merkado Karibense en komparashon ku e promé 6 luna di 2009.
  
Den yüni 2009 turistanan a pasa en total 215,871 anochi na Kòrsou kual ta indiká un bahada di 2% kompará ku 220,211 anochi den 2008. Den e promé 6 luna di 2009 turistanan a pasa en total 1,457,762 anochi na Kòrsou kual ta un bahada di 9% kompará ku mesun periodo den 2008.Un kantidat di 8.626 pasahero di barku krusero a bishitá Kòrsou na yüni 2009, kual ta nifiká un subida di 21%. Sigur awor ku situashon ekonómiko ta prekario mundialmente, ta nos tur su deber pa hasi nos máksimo esfuerso pa duna e turista krusero i esun di estadia un eksperensia úniko kual e lo kompartí ku famia i amigunan. Ofisina di Turismo no solamente ta konta ku personanan ku ta laborá den e sektor turístiko pero tambe pueblo en general pa sigui pone man huntu pa hasi e eksperensha di e turista na nos isla úniko.

< Prev		Next >