WILLEMSTAD - Despues di dos luna ya kaba bestür i direktor interino di FWNK, ámbos resien apuntá, a dal pasonan desisivo pa desaroyá e organisashon gubernamental riba un manera konstruktivo i inovativo. Durante un reunion informativo, direktiva di FWNK a 
presentá nan intenshonnan na Minister Hakim.
Ku un imágen klaro di e situashon interno, Fundashon Wega di Number Kòrsou ( FWNK) lo kuminsá desaroyá pa yega na un organisashon outomatisá, benefisiario i ku ta duna un aporte supstansial na komunidat di Kòrsou. Esei ta e mensahe sentral durante e presentashon di presidente di bestür, Marius Romer, i direktor interino Sithree van Heydoorn, na Minister Hakim. Pa yega na e punto ei, riba un manera struktura i stratégiko, den desèmber último, direktiva di FWNK a enkargá ofisina di akountent H.G.M. Jourdain B.V. pa hasi un quick scan di e situashon aktual.
Resientemente Minister Hakim di Desaroyo Ekonómiko, kual ta e minister enkargá ku e organisashon gubernamental, a konvoká e direktiva despues di a haña informashon alarmante tokante e promé konklushonnan di e scan investigatorio ku FWNK a inisiá.
Ta konosí ku e bestür resien apuntá a kuminsá nan trabou sin niun tipo di traspaso. E maneho di FWNK a bin kontra ku un situashon interno kaminda atministrashon no tabata up-to-date, dokumentonan no tabata korektamente di file, un fundeshi optimal di IT tabata falta etcetera. Tambe tin faktor eksterno ku a mantené e posishon di FWNK den un ku no por a desaroyá riba un manera optimal.
Asina, por ehèmpel, e leinan di loterij verordening ta desendé for di 1909. Pa por ofresé servisio na nivel i ku bista riba e demanda kontemporáneo, FWNK ke pa aktualisá e leinan, ku segun FWNK ta antikuá.
Tambe e fundashon tin kontakto ku nan komplemento den region di Karibe i Sur Amérika, pa asina haña mas informashon di faktornan ku por engrandese un strategia eksitoso. Awor ku a indiká e difikultatnan, FWNK aktualmente ta formulando un Business Case ku lo ser presentá na gobièrnu den yüli 2012. Segun e direktiva, FWNK lo desaroyá den un organisashon outomatisá, ku un mihó kòntròl riba e volúmen di benta, ku servisionan moderno i atraktivo, i ku realmente lo kontribuí na desaroyo di komunidat di Kòrsou.
Add this page to your favorite Social Bookmarking websites
| < Prev | Next > |
|---|