WILLEMSTAD - Minister Koeiman a tuma e desishon pa traha aselera riba leinan laboral pendiente of ku tin hopi tempu drumi. Tin demasiado inhustisia ta sosodé ku trahadónan i p'esei mes mester atendé ku e leinan aki i mesora reforsá inspekshon di labor i intensifiká
e kontrolnan pa por garantisá bienestar di trahadónan.
Aktualmente tin un eksperto ku mas ku 40 aña di eksperensia den inspekshon laboral na Korsou pa analisá nos situashon i bin ku rekomendashonnan i treinen pa asina reforsá nos kuerpo di inspekshon. Tambe nos ta den kontakto ku ILO pa hasi uso di nan ekspertísio pa reforsá i mehorá nos inspekshon laboral.
Pa por garantisá ku e leinan lo por keda realisá mas pronto posibel nos a buska e ayudo profeshonal di un hurista ku a baha ku penshun ku amplio eksperensia den gobernashon pa guia i vigilá e proseso di e diferente leinan.
E leinan ku ta kai bou di esaki ta esun di maternidat, e lei konosí komo 80-20 i e lei di kontraktnan ku durashon kòrtiku, lei di “uitzendburo”.
Fuera di e leinan aki tin algun lei mas pa kumpli ku e nesesidat i bienestar di trahadónan di Kòrsou ku ta den preparashon i algun ku ta kasi kla pa kuminsá kana e trayekto pa por ser publiká. E leinan aki ta entre otro;
1. Lei di Cessantia: ku esaki ta amplia e lei aktual di Sesantia ku e trahadó despues di un kantidat di aña respetá den servisio di un kompania lo por disidí na bai di e Empresa pa un òf otro motibu válido, i ta keda ku derecho pa haña su Sesantia, pasobra tin diferente ehèmpel di kasonan ku un trahadónan ku tin un kantidat di anja respeta na un Empresa ta ser provoká pa dunadó di trabou mes pa asina e rabia i bai for di e empresa di su mes. Konsekuensia ta ku e no ta haña nada nada di su añanan di servisio, komo ku ta e mes a bai.
2. Lei di Referendum; esaki ta un lei ku tin bastante aña den diskushon pa e drenta na vigor di moda ku ora un Sindikato kier representá e trahadónan di un empresa, ku no mester tin asina tantu formalidat pa nan haña e representashon di e trahadónan, i evitá asina e tantísimo manipulashon nan ku sa tuma luga entre di e doño di trabou pa ku e empleadonan, i evitando asina problema entre Sindikatonan i Empresanan. Lo bai trata na hasi e trámitenan mas fásil igual ku e mes un sistema ku na Aruba ta ser aplika.
3. Art/ 1615 h. Esaki ta un artikulo ku ta duna derecho na un doño di trabou pa por kita of pidi permit pa kita un trahado for di trabow, si en dado kaso e trahado ta malu pa un aña of mas, esaki no ta importá ku ta pa malesa normal di e trahadó, of tin biaha por a malesa ku ta originá for di e tipo di trabou ku e trahadó ta traha, (beroepsziekte), of ku ta un malesa dor di un desgrasia ku a tuma lugá na e trabou mes. Minister ta kere ku si e 'behandeling met Loonderving' tin un durashon di dos (2) aña konforme e lei di asegurado di S.V.B., pa por alargá e artíkulo 1615 h aki igual ku e lei di malesa di S.V.B. ku su pago di dos (2) aña.
4. Aseguro èkstra pa trahadónan, i spesialmente esnan ku ta trahando riba e diferente puestonan ku tin hopi riesgo di eksploshon di kandela di tur tipo di desgrasia, ku lo por tin posibilidat di morto, ku e trahadó lo por haña su morto, pa asina den kasonan semehante, ku e famianan lo por haña algu pa e sobrebibientenan, i prinsipalmente e yunan ku lo keda atras, nos mester prepará pa si akaso kasonan asina toka na nos porta, pasobra nos trahadónan no tin un seguro kontra morto, i si e ta afiliá na un sindikato, algun din an lo tin un rekompensa pa den kasonan di morto, i mayoria di nos trahadónan no ta sindikalista i no tin un kontrato kolektivo, esei ta nifiká ku Minister tin hopi atenshon pa e punto aki tambe i lo traha duru pa por atendé.
5. Penshon permanente. Ku Penshon permanente Minister kier men pa tur trahadó tin un penshon, i e penshon lo ta di tal forma ku un trahadó unda ku e traha, outomátikamente e ta ser inskribí i hinka den un aseguro di PENSHOEN, i no ta importá na unda e traha den ki kualidat el'a traha of e ta traha, esaki ta un lei ku e mester haña un aseguro di kual e ta paga un parti i e doño di trabou ta paga un parti tambe pa e aseguro. Na unda ku e trahadó bai traha i pa kual kompania ku e bai traha den ki ramo ku e bai traha e ta keda ku su seguro, i mester paga tur luna of ta siman of ta pa kinsena, pero e mester paga konforme su suèldu i e porsentahe ku e mester paga pa asina tur trahadó lo tin un seguro pa nan mañan ku Dios kier.
6. Tambe lo bai traha pa reglamentá e asuntu di OPROEPKRACHTEN / PARTTIMERS / INVALKRACHTEN, esaki no por sigui bou di ningun kondishon, ta bai hasi tur loke ta posibel pa trese e kambionan den e Lei ORDENANSA di trabou pa asina eliminá e abuso aki.
7. E asina yama lei di “verbindend verklaring” di C.A.O. kua hopi aña pasa a ser entrega na Staten di Antia Hulandes, lo analisá e lei, adapt'é si ta nesesario i hasi tur loke ta posibel pa e lei aki bin na vigor.
8. Ketenaansprakelijkheid; esaki ta un lei importante pa evitá ku por keda sin asumí responsabilidat i baha bai laga trahadónan desampará òf keda sin paga SVB, Belasting etc.
Mensualmente lo duna informashon kon ta para ku tur e diferente leinan aki. Tantu na sindikatonan, doñonan di trabou komo e pueblo di Kòrsou.
Add this page to your favorite Social Bookmarking websites
| < Prev | Next > |
|---|