DEN HAAG - Durante su bishita na Ulanda, Promé Minister Gerrit Schotte a hasi un bishita na Koninklijke Instituut voor de Tropen na Amsterdam. Koninklijke Instituut voor de Tropen (KIT) ta un instituto multi disiplinario pa kolaborashon riba nivel Internashonal, 
ekonómiko i interkultural. KIT ta traha huntu ku gobièrnunan, industria i komèrsio i organisashonnan manera Nashonnan Uní, Union Europeo i Banko Mundial.
KIT pa basta tempu kaba tin kolaborashon ku Kòrsou riba e tereno di arte históriko i herensha kultural. Durante e reunion ku Promé Minister Schotte tabata tin ku direktor di KIT Sr. Jan Donner a papia riba posibilidatnan pa ekspandé e kolaborashon riba e tereno di historiografia den kuadro di nation building.
Otro temanan ku KIT tin konosementu i eksperensia kuné ta desaroyo duradero i desaroyo den agrikultura. Promé Minister Schotte a indiká ku agrikultura ta un tópiko importante den e programa di gobernashon i ku tur konosementu balioso ku nos por haña riba e área aki ta importante pa futuro di agrikultura.
Representantenan di KIT lo hasi un bishita na Kòrsou den luna di aprel. Promé Minister a indiká ku lo bai elaborá e temanan ku a wòrdu diskutí pa bini huntu atrobe na aprel i duna "follow up" na e reunion.
Despues di e reunion direktor di KIT Sr. Jan Donner a duna Promé Minister un rekorido den Museo Trópiko (Tropen Museum). Tambe Promé Minister a haña mapanan históriko di Kòrsou pa mira ku ta wardá den kambernan spesial ku temperatura kontrolá ku normalmente por haña solamente pa mira riba e website www.kit.nl.
Promé Minister ku tin hopi konosementu di mapanan di Kòrsou a nota direktamente ku Gobièrnu di Kòrsou tin un mapa di 400 aña bieu ku KIT no tin ainda. Sr. Schotte a hasi direktor di KIT e promesa ku e lo manda un kopia eksakto pa e instituto asina ku e regresá Kòrsou. Di e manera aki Promé Minister a mustra ku ekspanshon di e kolaborashon entre KIT i Kòrsou ya kaba ta tumando lugá.
Aparte di Kòrsou KIT ta aktivo na entre otro Costa Rica, Haiti, Sur Afrika, Indonesia, Kabo Verde i mas ku 60 otro pais rònt mundu.
Add this page to your favorite Social Bookmarking websites
| < Prev | Next > |
|---|