Sr. Ivar Asjes, relashoná ku e último veredikto riba nombramentu na Selikor…
Willemstad - Suidadano Ivar Asjes a tuma nota di e veredikto riba e salario ku Selikor a pagé komo direktor, alabes direktor-general suplente, a base di un nombramentu di e akshonista di Selikor N.V. kasi 5 aña pasá i un veredikto fechá 19 di yüli 2007. Según Asjes, e 
último veredikto aki a resultá manera ela spera, esta un rechaso pseudo-polítiko na su persona di parti di ‘Politiek Den Haag’ i e Korte den kua al final ta polítika, esta Konseho di Minister di Reino, ta nombra tur Wes.
Pa Asjes ta insólito ku Wes Mr. Van Schendel den kasi 7 di e 13 paginanan di su veredikto ta papia di: “de feiten”, kaminda e ta djis ‘copy paste’ parti di e tekstonan di algun veredikto kontra Asjes di pasado. “Kaminda ta kumbiní Van Schendel e ta usa un base hurídiko i kaminda no ta kumbiní e ta presentá un ‘politiek verhaal’ pa trata na hustifiká su subhetividat klaramente bisto.
Ademas, Van Schendel no a menshoná nada di e veredikto di 19 di yüli 2007, kaminda Korte a trese bon kla dilanti ku tabatin un vakatura habrí na Selikor pa un di dos direktor; ku mi ta kapasitá p’e funshon aki; ku e salario di’mi nò ta desviá for di lo usual p’e funshon; ku abase di artíkulo 7 insiso 4 di e statutonan di Selikor un direktor ta keda nombra dor di AVA (esta akshonista); ku AVA di Selikor nò tin un obligashon legal òf statutario pa bini ku un prosedura di solisitut habrí pa e funshon di direktor; ku tantu AVA komo hunta di komisario di Selikor a bai di akuerdo ku e nombramentu; i por último ku hunta di komisario di Selikor tabata kompetente i outorisá pa negoshá ku’mi riba mi kondishonnan di trabou i pa na nòmber di Selikor sera un kontrat ku mi persona komo direktor e tempu ei”.
Klaramente por mira ku ta midi ku dos midí, pasó na un banda ke trata na krusifiká Asjes polítikamente pa un nombramentu na Selikor di aña 2007 pero na otro banda ta keda ketu riba e nombramentu di Sr. Glen Carty komo e di dos direktor na UTS. Anto esei ta djis un ehèmpel di tur e nombramentunan ku a tuma lugá for di yüni 2007 na Kòrsou pero tambe na Ulanda, kaminda (e tempu ei Minister) Wouter Bos a nombra èks-Minister Gerrit Zalm komo direktor di ABN AMRO Bank sin solisitut despues ku Gobièrnu Ulandes a nashonalisá e banko aki.
Finalmente, Asjes ke enfatisá ku e lo respetá i kumpli ku e veredikto p’asina yuda kubri e mas ku 100 mil florin di Pueblo ku Selikor a gasta durante e yagmentu polítiko di años aki riba su persona. Na mes momentu Asjes ke pone bon klá ku e komo siudadano ta lamentá e forma desbalansá ku Korte i su Wesnan mandá for di Den Haag ta argumentá nan verediktonan. Ta p’esei ta bon pa Pueblo tuma bon nota ku no ta tur Wes di Ulanda ta hende korekto ku un konsenshi limpi pa yega na verediktonan independiente i no-partidario. Djis wak e siguiente website: www.schipholwanbeleid.nl/?sid=97&nid=968
Add this page to your favorite Social Bookmarking websites
| < Prev | Next > |
|---|