WILLEMSTAD - Riba djabièrnè 20 di yanüari, Minister Hakim a dirigí palabra durante e seremonia ‘White Coat’ di St. Martinus University Faculty of Medicine. Hakim a urgí pa e profeshonalnan médiko, hasi uso di e oportunidatnan ku e desaroyonan manera turismo di 
salubridat i konstrukshon di e hospital nobo, lo ofresé.
Minister Hakim a bisti 15 Studiante di Martinus University e djèket blanku di dòkter, durante e seremonia di ‘White Coat’ ku a tuma lugá na Hyatt. E asina yama ‘White Coat Ceremony’ ta enserá un tradishon kaminda un universidat médiko ta wèlkòm studiantenan nobo di medisina di promé aña, dor di presentá nan ku un ‘White Coat’, kual ta e djèket blanku di dòkter ku nan lo usa.
Den presensha di entre otro Kònsùl General di Merka, sra.Valerie Belon, direktornan di e universidat i famianan di e studiantenan, Minister Hakim a dirigí palabranan di apresio na e studiantenan, ku a skohe Kòrsou komo nan destinashon di estudio. Tambe Hakim a menshoná ku e studiantenan mester ta konsiente di e kantidat di oportunidat, ku e aktual desaroyo den sektor di salubridat ta ofresiendo. Hakim a referí na liberashon di e tarifanan riba merkado di salubridat na Kòrsou, ku tin komo konsekuensha ku institutonan na Kòrsou por kobra un persona ku ta biaha bin Kòrsou pa hasi uso di tratamentu médiko, preisnan mas kompetitivo.
Tambe e minister a indiká ku e team di speshalista, ku e la apuntá, aktualmente ta studiando e manera mas efektivo pa implementá i integrá Turismo di Salubridat den ekonomia di Kòrsou. “Pa boso, e desaroyonan aki ta representá e oportunidat pa ta kreativo i skohe riba kua nivel bo ke laga bo karera krese. Kisas e siguiente siruhano renombrá, ku ta operá aki riba nos isla, ta sinta meimei di nos awe nochi”, asina Minister Hakim a bisa durante su speech.
St. Martinus University Faculty of Medicine ta un di e tres universidatnan médiko na Kòrsou. Mayoria di e studiantenan ku a tuma parti na e ‘White Coat Ceremony’ ta studiante di eksterior, manera Merka, Canada, Ruwanda, Siera Leone, Sri Lanka, Hulanda, i Dinamarka. Segun Minister Hakim, kada un di e studiantenan, inkluyendo famianan ku por bin di bishita, ta trese un fluho di sèn den negoshinan i alabes ta trese entrada di belasting. Nan ta paga skol, kumpra produktonan i servisionan, paga pa nan kuminda i transportashon. Esaki, ta kontribuí no solamente na nos imágen mundial enkuanto edukashon pero tambe na nos ekonomia, pues ta importante pa nos sigui desaroyá nos ‘Knowledge Economy’.
Riba potrèt: Minister El Hakim di Ministerio di Desaroyo Ekonómiko huntu ku e studiantenan di St. Martinus University Faculty of Medicine durante e seremonia ‘White Coat’..
Add this page to your favorite Social Bookmarking websites
| < Prev | Next > |
|---|