 |
Ekselensianan, presentenan, i partikularmente nos siudadano ku lo risibí kondekorashon real un djis aki, Un gran amigu di mi, Erich van der Hoeven a yega di bisa na 2004 i mi ta sita: “Kultivá flor si bo tin vishon te ku un aña, pero si bo tin vishon pa 10 aña kultivá palunan grandi di fruta. I si bo vishon ta basá riba kontinuidat, e ora ei, kultivá hende”
Awe mainta mi tin e honor atrobe di kondekorá algun siudadano noble ku na nan manera a yuda kultivá otro hende. I no esaki so! Nan lo por siña nos tambe kon pa kultivá hende si nos sigui nan ehèmpel. Awe meskos ku tur aña na e otro islanan kada gezaghèber ta entregá e kondekorashonnan korespondiente riba nan isla.
Na Sint Maarten gezaghèber Richards ta entregá 9 kondekorashon i na Boneiru gezaghèber Thodé 6 kondekorashon. Ami lo entregá mas aki ratu kondekorashon na 15 persona pará aki nos dilanti. A komplasé Su Altesa La Reina Beatrix pa kondekorá nos suidadanonan riba e diferente islanan pa e motibunan mas diverso ku por tin.
Na Kòrsou nos hendenan lo haña kondekorashon pa nan trabou riba tereno di edukashon, kuido di hóben i ansiano, riba tereno di salubridat i alimentashon na un manera holístiko. Nos tin persona ku a destaká, hasiendo nos patrimonio kultural históriko aksesibel pa un públiko muchu mas grandi.
Nos tin diferente persona riba nos islanan ku a yuda engrandesé amor pa teater, muzik i baile. Diferente di nos artistanan konosí, manera Tania Kross, Eric Calmes i Randal Corsen a kuminsá serka nan. E relashon entre Kòrsou i diferente pais latino lo no tabata bon manera e ta awor, si no tabata pa e trabou inkansabel di algun di nos kondekoradonan. E trabou den Scouting Antiano tabata otro motibu pa Su Altesa otorgá kondekorashon na siudadano.
Nos tin kondekorado ku pa tantísimo aña ta dediká nan mes na trese amor pa literatura serka nos hóbennan i tambe serka e públiko en general. Ta un hecho ku nos ekonomia a sobrebibí e krísis mundial di último tempu ku esfuerso di siudadanonan ku lo risibí kondekorashon mas aki ratu.
Deporte tambe tabata un fuente di inspirashon pa sierto kompatriota di nos pa yuda kultivá nos hendenan riba nos islanan komo sifuera ta flor, mata i palu den naturalesa nan ta. Esaki ta konta tambe pa aktividatnan denter di nos klupnan sosial i iglesianan.
Distinguido presentenan mi ke pidi boso atenshon i atmirashon pa e siguiente siudadanonan:
|
Nos ta nota ku di bèrdè mes, ta trata di siudadanonan ku a yuda eduká, forma, prepará i desaroyá nos hendenan. Mesora tambe nan a promové kultura, esta kultivando literatura, muzik, baile i otro formanan di ekspreshon den nos komunidat. Realmente nan mester permanesé komo ehèmpel fuerte pa tur otro. Na nòmber di Su Altesa Reina Beatrix, gobièrnu di Reino, gobièrnu di Antia Hulandes i ku pèrmit di gezaghèber di Kòrsou na nòmber di gobièrnu di Kòrsou i tambe na nòmber di mi señora Dulcie mi ta felisitá boso tur ku boso kondekorashon.
Masha pabien tambe na famia-, amigu-, kolega- i konosínan di e kondekoradonan.
Add this page to your favorite Social Bookmarking websites
| < Prev | Next > |
|---|