Un bia mas danki pa tur esnan ku a bin risibimi na airopuerto pero danki tambe na tur esnan ku no a bini pero ku sigur no lo a lagami na kaya! Bon, nami kumisa splika mesora kon e ekspedishon pa Antarctica tabata.
E palabra 'bon' ta kai hopi chikitu komo diskripshon pues nami uza mas:
Antarctica tabata inkreibel, fenomal, extraordinario kaminda tin un sanktuario inimaginabel. Yen sorto di bestia manera pingwino, 'humpback whales', orka, 'seals' i yen sorto di para! Naturalmente.
TUR KAMINDA TIN IJS! Tin ku ta chiki manera grijsi tin ku ta mes un grandi ku e boto ku nos tabata aden i otronan tabata tapa henter un seru!Prome ku mi splika kon Antarctica tabata, nami splika prome kon mi a yega Antarctica. Mi a a bula di Korsou pa Colombia después bula pa Buenos Aires na Argentina i después ma bula pa e stad di mas sur na mundu ku yama Ushuaia.
Nos a keda 3 dia na Ushuaia pa sera konosi ku otro i kumisa prepara pa bai Antarctica. Dia 27 di mart nos a embarka e boto Akademik Ioffe kual nos lo nabega dos dia largu prome ku nos yega Antarctica.
E boto aki tabata wordu uza primordialmente pa hasi investigashonan sientifiko den pasado pero awor e ta wordu uza pa ekspedishon i otro aktividatnan turistiko tambe.
Akinan bo po haña un idea kon grandi e boto ta. Esakinan ta momentunan tambe ku nos tabata. 
Durante e dos dianan riba laman, nos a pasa dor di e pasashi ku yama The Drake Passage.Esaki ta e laman di mas brutu na mundu pa motibu ku akinan ta kaminda oseano Atlantiko i oseano Pasifiko ta topa ku otro. Pa nos di malu tabatin un storm hopi fuerte tambe.
Wak e imagen kaminda ta mustra kon haltu e parti dilanti di e boto ta! Awor boso ta wak den kiko nos pasa! Durante nos estadia riba e boto nos a sigui diferente kurso di medio ambiente, kambio di klima i teknologianan di kombustibel. Pero no ta tur ora nan tabata bai bon pasobra hopi hende tabata bira malu.Asina malu ku dia 28 di mart, e sistema ku ta regla preshon di awa di e bañonan a 'verstop' pa motibu ku tabatin hopi hende ku a saka i esaki a bira mucha pisa pa pomp. Heheheh
Bon, dia 29 di mart nos a yega Antarctica. PORFIN! Mi a pega diferente potret banda di otro i esaki ta un bista di 180 grado riba e boto ku bista pa e kontinente. (Esaki tabata alrededor di 7or di mainta) Esaki ta loke bo ta mira ora ba yega
Mi no a spera nunka ku ora bo saka bandera di bo pais bo ta haña orguyo enorme di ta dje pais ei. Ora ku m'a saka bandera di Korsou, tur e studiantenan kier a saka potret di nos bandera! Mi a risibi esaki komo un regalo di parti di
Hubert Hoogflied di Bo Tra'i Merdia. Esaki tabatin hopi pero hopi efekto positivo ayanan na Antarctica. Tin studiante ku a kumisa papia serio pa bini Korsou Danki un biaha mas.
Nos a kamper tambe riba ijs riba e prome ku delaster dia ku nos a nabega bai bek Ushuaia. Esaki ta un imagen di e preparashonanriba e atardi prome ku nos a kamper I finalmente e sigiente potret ta bira mi delaster potret p'aworaki paso ta tuma eksageradamente hopi tempu pa mi hinka potret na e formato grandi aki den e-mail.
mi ta kere ku e dia aki nos a marka historia atrobe. Mi no sa si ta kos di hende kabes bon m'a hasi pero enfin. Mi ta laga boso tur den espektativa di kiko mi a hasi
Mi lo bai hasi diferente presentashon ront Korsou kaminda lo mi komparti tur mi eksperesha i konosementu ku mi a gana durante di e ekspedishon i sigur sigur lo mi splika ta kiko a pasa den e delaster potret ei! Lo mi anunsia via medionan di komunikashon ki dia,ki ora i na unda lo mi presenta.Masha masha danki pa boso atenshon presta durante e delaster simanan!
Add this page to your favorite Social Bookmarking websites
| < Prev | Next > |
|---|