NOSTEVE TELEVISIE VOOR U DOOR U

CTB ta invitá tur interesado pa partisipá na tayer general dia 20 di òktober

WILLEMSTAD – Curaçao Tourist Board (CTB) a start e proseso pa desaroyá un Plan Maestro pa desaroyo di turismo di Kòrsou konhuntamente ku partnernan lokal. A lanta un steering committee ku ta konsistí di diferente stakeholder pa guia e proseso aki.

E steering committee ta konsistí di representantenan di CTB, Departamento Ekonomiko (DEZ), Curaçao Airport Holdings, CHATA, Banko Sentral, Curaçao Ports Authority, D.R.O.V. i tambe Carmabi. Konhuntamente a selekshoná e büró Halcrow pa traha e plan maestro turístiko pa Kòrsou. Halcrow tin hopi eksperiensha internashonal i tambe den Karibe riba tereno turístiko. E büró lo desaroyá konhuntamente ku e steering committee un plan ku mester deliniá kua ta e mihó strategianan pa alkansá nos metanan den e próksimo 5 aña.
 
Lo evaluá kua ta e metanan deliniá den e Plan Maestro anterior di 2005 pa 2009 ku a alkansá kaba; kua no a alkansá i e motibu prinsipal dikon eseinan no a keda alkansá. Despues lo traha e plan pa e próksimo 5 aña teniendo kuenta ku nos oportunidat i limitashonnan lokal i internashonal. E aksènt di e plan di e próksimo 5 aña lo ta Kòrsou su strategia pa alkansá desaroyo turístiko duradero.

Lo analisá konhuntamente ku ekspertonan lokal e situashon aktual mundial i su efektonan riba nos desaroyo turístiko a korto i largo plaso. Tambe ta bai evaluá Kòrsou su oportunidatnan i limitashonnan riba diferente área manera por ehemplo  desaroyo di produkto; desaroyo di merkado; ‘airlift’; desaroyo krusero; rekurso humano; infrastruktura; konsientisá pueblo, etc.

E tim di Halcrow International ta konsistí di vários eksperto den e ramo di turismo. E grupo a bishitá diferente instansia i persona; i tambe lo bai tene diferente workshop.

Dia 20 di òktober próksimo lo tene un workshop den kua partisipantenan ta bai haña un bista riba e konklushonnan i rekomendashonnan preliminar. Tambe tin oportunidat pa partisipantenan analisá mas profundo strategianan en konekshon ku merkadeo, desaroyo di produkto, ‘airlift’ i naturalmente desaroyo di barku krusero. Un petishon ta bai na tur interesado pa reserva dia 20 di òktober mainta. Pa registrá pa partisipá na e workshop por tuma kontakto ku Gianina Atalita na telefon 434 8203 òf 521 1718 òf via e-mail gatalita@curacao.com i tambe Arelys Meulens na telefon 434 8221 òf e-mail ameulens@curacao.com. Despues lo anunsiá e lokalidat kaminda ku e tayer ta bai tuma lugá.
Pa realisá e Plan Mayó di Turismo CTB ta konta ku sosten di instanshanan ku di un forma òf otro ta relashoná direktamente òf indirektamente ku turismo. Esei ta e úniko forma pa nos por alkansá desaroyo duradero di turismo di nos isla.

 

< Prev		Next >